Rom 1 | BEF | STEP | Nani Poluita, Yesu Kilisitohi koko pana'a nohuto ma fayahi nogobe. Koyapa'i Hu'mau nani kumu kehe ito nele'mo ho tito ka lamana'a lu yege hobo luto lu nimi'ehina yabe.

Romans 1

1 Nani Poluita, Yesu Kilisitohi koko pana'a nohuto ma fayahi nogobe. Koyapa'i Hu'mau nani kumu kehe ito nele'mo ho tito ka lamana'a lu yege hobo luto lu nimi'ehina yabe.

2 Koyapa'i Hu'mau kaga lu huto hulata bona'magihi ya'ma hetofa ka lamana'a molo epigo to ana kaga mono bukugu fayahi ge'ahana yabe. 3 Hu'mamofihi pana'a lali Sipi Boti Yesu Kilisito yabe luto ai kumu ya'ma hetofa ka lamana'a ni'inagihe. Ai Tebitihi nagatogati o'ehina'a lusi bo nohibe. 4 Ai fili'ehinogo aku Hu'mau fili'ehinaguti le'mo ho ti'ehina to sipi amuya'a hiti mino'ehina. Yana'mu ai Hu'mamofihi lusi pana'a nohibe luto hapa'a hetofana ni'igo lali bu goloto keheli'ohuta yabe. 5 To Hu'mau Yesu kumu ai koko pana'ni nohane luto lu nimito nele'mo ho ti'ehina. Hena'mube? Nani asaga melugu bona'i kaga'a lu epinogomo ka kehelite komopa'ani Hu'mamofitoga mele emite minalabe luto ya'ma noho lifito ana lili'na sipi'a nimi'ehina. 6 Ya'ma lenali Lomu hepato bona'i hiti ka lamana'a lu lepise nehanana ya'ma Hu'mau lenalimo kehe igo Yesu Kilisitohi mege'i mele'ahanaya.

7 Ya'mu luto nani fayahi lenalitoga asaga Lomu bona'i Hu'mau komopa'a lepito to nani yagapana'i nehabe lu'ehinalo nogobe. Ai Hu'mau afotifu to Sipi Boti Yesu Kilisitohi fuluna'a hiti lenehe'mose'na'a hiti lenalitoga mineno.

Foke ka lu'ehina

8 Yata'a nani lenali kumu Hu'mamofitoga gelo nohube. Hena'mube? Asaga hepatoga nobunogo noto noto bona'magi lenali Yesu Kilisito mege'i nemalanamu'i ya'ma kaga liba liba nehana yagi akehelito gelo nobube. 9 Nani Hu'mamofihi pana'amu ya'ma hetofa ka lamana'a lu yege hoba hoba nohube luto'ni ya'mana lusiga noluta Hu'mau ai keheli bati hu'ehina. Ma'naka luto nani asaga yupahi ete hiti ute hiti lenali kumu Hu'mamofitoga nunumu nohugo ana huto ai keheli'ehina yabe. 10 To nani ma hepato nominoto lenalitoga bilube'mu nohuto Hu'mamofihi loka henogo ai lu laga mehinogo kapo moloto lenali nehanalo biluna'mu yabe. 11 Nani ya'ma huto bu lenagaluna sipi laga'ni nonebesibe. Nani mono ka mone'a hiti lepilenogo amuya melete minalabe luto bilube'mu nokehelube. 12 To ya'ma huto hapa'a ma ni'ibe. Buloto'ni lenehe'menogo lenali ana hite nehe'malabe. Nani'ni Yesu kumu keheli ule'ale nohunauba lenehe'malibe. To lenali keheli ule'ale nehanauba nehe'menogo huto minalune.

13 Nalalu'nigitabe, keheli fe lilo. Babu yupahi lenalitoga buto lenebe ligilube'mu nohugomo fato lili'nauba nele'mo mololata nohibe. Nani nekesa kehelito fegutoga bona'i Hu'mamofihi kaga'alo mege'i mele'ahana suhi luto lenali ana hite mege'i malalabe luto ya'ma nebesi'ehina. 14 To nani melugu bona'i asaga'namofihi nona'a suhi huto epilube. Hena'mube? Ka keheli bati hi'ahana bona'i hiti ka mekehelise bona'i hiti to sipi hepatoga neminana bona'i hiti kifigu neminana bona'i asaga'i enali'i ka lamana'a lu epiluta to enehe'maluta ya'ma nani lili'na'ni ni'ibe. 15 Ya'mu nani Hu'mamofihi ka lamana'a lenali Lomu hepatoga neminana bonatoga lu lepilube'mu nohugo sipi laga nebesigo ana foya lilube luto amuya molo'ohube.

Hetofa ka lamana'a amuya kaga nina

16 Hetofa ka lamana'a keheli fe lu'ohunogo nelesa'ni melu'ehibe. Hu'mamofihi kaga'a amuya ka hiti ninauba bona'magi Yesutoga komopa'ani nemalanamagihi asaga'i ya'ma enubuto bilina'mu yabe. Ana kagauba Yuta bonatoga kohe toto buloto yalo fegutoga bonatoga buto enele'mo bati hilina'mu yabe. 17 To ya'ma hetofa ka lamana'auba foipa bona'i Hu'mamofihi bu'alo enele'mo bati hilina ya'ma lelepi'ehina yabe. Hapa'a henana ni'ibe? Yata'a hiti to aliha'a hiti bona'magi Yesutoga komopa'ani emite nehago enele'mo bati hilina. Ya'ma ka lamana'a hapa ni'ibe. To koyapa'i mono bukugu fayahi ge'ahana ma ni'ibe:Bona'i moneuba Hu'mamofitoga keheli ule'ale huto agoya hu emigo, ya'ma bomofihi Hu'mau bebe sose bo nohibe luto mino kosaba huse'na emilina'mu yabe.

Asaga bona'magi Hu'mamofihi enemegesa hu emi'ahana

18 To bona'magi enali foipa faipana'ani babu lite liba liba nehite to hetofa kaga'a fala kite to hetofa kapo hekini lalibe. Hu'mau ya'ma foipana nasanamofihi bu goto sipi enipakafa halinamofihi ya'ma kokulumaluguti limi'ehina abu go'ohune. 19 Bona'magi Hu'mamofihi hapa'amu enali komopa'anitu akeheli bati hi'ahana. Hu'mau ai'a hetofa hapa'a huto'i enelepi'ehibe. Ya higo enali Hu'mamofihi hetofa hapa'a akeheli'ahanamo aku'i enali foipana lilana ya'mu Hu'mau osahi epilata nohibe. 20 Koyapa'i Hu'mau kokuluma'i hiti me'i hiti li huto hu'ehinafi ai fenene huto nina hapa'afi to amuya'a minoba minoba huse'i hiti meha'a hiti abu go huto hi'ahabe. To ya'ma hiya'a huto hu'ehibe? Enali ai'a lolo hu'ehinana bu gete keheli'ahana. Enali Hu'ma nohifi menohibe lite ya menelabe. Ya'ma ka meni'ibe. 21 Enali ai kumu keheli bati hite aku gi'a liyafa menehabe. Aitoga enofokehi menelibe. Enekesa keheli sibina nehite negi nagi nete neminago komopa'anigu metepu sipi'a gi'ehibe. 22 Enali keheli baga i'ohune lilata nehanaya faga faga lite negi nagi nete mine'ahana yabe. 23 Enali ya'ma minoba minoba nohina bo, Hu'ma, ai'a gi'a liyafa mehite to fokehi melilata nehabe. To mone enali'ani lolo hi'ahananamofihi ya'ma liyafa hite kanipo nefibe. Ana'ina meha'a lolo hite yege nefibe. Bomofihi meha'a yagi namamofihi meha'a yagi kafa'namamofihi meha'a yagi osifa meha'a yagi efapotufi yafatufi lolo hilete lipite yege filata nehabe.

24 Ya nehago Hu'mau megesa hu epi'ehina. Ai nehanalo memino'ehigo enekesa yigi'ahanamo foipana fato fato'i nehite to asaga hapa'ani kolota kolota nehabe. Ya hananauba enugufa'ani li sibina fato fato'i nehabe. 25 Enali Hu'mamofi kumu lusi kaga keheli he'mite faga luse'nalo mege'i malalana enali Hu'mamofihi agoya hu meemise ai'a lolo hu'ehinanalo lipite nunumu nehana yabe. To Hu'ma aisigo lali lipito lofoke ka lu emuba lu emuba hiluta ya ni'igi keheli'ohune. Ma'naka yabe.

26 To ya nehana'mu Hu'mau ana bona'i bu enogoloto enalitogati he'mito megesa hu epi'ehina. Ya higo enali fato fato foipana'ani babu lite nelibe. Enali alobole nehana suhi he'mite fato suhi nehana. Ana'magi enali hapa'ani he'mite foipa hapa'amofihi mege'i melete ana'i fato fato'i moko liba liba hi'ahana. To bomagi ana hite ana'mo he'mite enipagu laga epesigo bonatoga bite moko nelibe. Ya hite, enugufa'ani le'mo sibina hi'ahago yana'mu enali foipana'animofihi nona'a lilabe.

28 Hu'mau ana bona'i yege yege'na enalitogati he'mi'ehigo enali ya'ma Hu'mamofi kumu lusi kaga ni'ina ya'ma mekehelite pelesa ite enegekesa keheli'ahana fato fato'i ya'ma mege'i nemalabe. Bati mehina supo hite neminabe. 29 Enali komopa'anigu li sibinana foipana fato fato'i babu lite bai tete minabe. Enali fe'noha'ani li moloba moloba nehite lalitisigo ni'inaga lite musufalo bomofihi meemise'na to kenasabo bise'na to bomofihi yogo fe'noha'a bu gelete lilube lise'na to enoho filise'na to luba hise'na to faga faga luse'na to enipakafa hoto enemegeka luse'na to bona'i mone kumu musi musi ka lilete faga luse'na nehana yabe. 30 Enali folagaha'anigu foipa ka ai lu emigo ai lu emigo minose'na to Hu'mamofitoga ipakafa hise'na to huli ka lise'na to enugufa limo titi hise'na hiti to kugumalugu hutu hata hise'na to enali foipa enekesa yigise'na to ito'anigihi afo'anigihi kaga keheli he'mise'na babu lito enalitoga mino'ehina yabe. 31 To enali moko lilata nehana. To enali enogolagalo enayahi tite kaga mele'ahana yamofihi he'mite pelesa ilata nehana. To enali'ani hetofana hu epelese meni'igo to eniginaga mefilata nehabe. 32 To bona'i moneuba Hu'mamofihi keya ka mege'i memalalinagi fililina'mu yabe lite nelana ya'ma keheli fiya i'ahana. Ana mono ka akeheli'ahanaya aku foipana'ani hilata nehabe. To bona'i moneuba foipana li huto hinogo enali bu gelete bati huto yagi yana suhi hubo, lite lu emi'ahana yabe.